新冠肺炎疫情有所緩和，但係唔代表可以掉以輕心! 瑞典政府宣佈，為咗預防病毒喺室內散播，取消秋季入學試，由於春季入學試已經因為疫情取消，即係話瑞典已經取消全年大學入學試!
瑞典嘅大學入學制度採用雙軌制，學生可以用高中校內成績，或者大學入學統一試成績升讀大學，所以就算冇咗大學入學試都唔會對大學收生程序有太大影響。大學入學試通常一年舉行兩次，對應每年秋季(8/9月) 同春季 (1月) 開學。
大學及高等院校議會 (Universitets- och högskolerådet, UHR) 正考慮下年春季開設兩次考試，以便紓緩入學需求。考試成績有效期由五年延長到八年。由於失業率高企，政府已經增加大學學位數目，以便失業人士就學進修。
資料來源: 每日工業報 (Dagens industri)