話咁快又到開學嘅時間啦! 再一次恭喜大家喺瑞典聯招取得學位嘅朋友，喺度我會為大家分享瑞典留學生活嘅幾個小貼士:
1. 讀書、上堂、考試
今年瑞典部份大學已經回復喺校園見面上堂，至於其他大學就會提供見面+網上上堂。記得去自己大學內聯網確認課程註冊 (否則可能會冇書讀)! 凡有課程註冊就可以去申請/攞學生證。
瑞典嘅大學課程比較注重互動、分組討論、自行探索。上堂當然會有教書，但更多時係分組討論、發表意見。功課嚟講，基本上參唔多一定有group project。
喺瑞典住，基本上一定要識數 week number (每星期由星期一開始)，各大學校、公司、公營機構都會使用。例如今年係 week 36 開學，聖誕係 week 52。
留意吓course outline嘅assessment部份，會講明邊啲係計份嘅堂，邊啲唔係。唔係計份嘅堂，通常都可以走堂 (走得多堂嘅話最好同老師講聲)。計份嘅堂，miss咗嘅話通常按規定要提供補課/替代功課。
每個 programme 都會有個 programme coordinator，如果要討論讀書進度、揀科、休學等，可以同佢傾。
如果想學瑞典文，有兩個途徑。第一係報讀自己大學嘅課程，好多時都係唔計學分。第二係去自己住嗰度嘅市政府 (以人口登記為準) 讀 Svenska för invandrare (SFI) 新移民免費標準語言課程。
瑞典大學除暑假外會放兩次假: 聖誕節 (長假，通常兩個星期)、復活節 (短假，通常只放公眾假期)。
考試 (瑞典文 tentamen，簡稱 tenta; 留意 examen 喺瑞典文指畢業!) 通常都係校方統一管理，可能會唔同course嘅同學一齊考，要check身份証等等。部份course可能會實行在場電腦考試，即係要喺自己電腦安裝一個特別考試程式，然後帶去試場，程式會喺考試期間將畫面鎖定喺試卷，期間上唔到網等等，雖然聽落有啲麻煩，不過的確係公平嘅。部份course會以寫essay/take home exam作為主要評核。
考試唔合格，通常按規定可以補考，唔需要 retake。部份例如Karolinska醫學院會限五次補考。成績太差可能會無法升班，但我未聽過會好似香港咁probation/勒令退學。
2. 設施、校園生活
講到校園設施，瑞典嘅大學未必非常好 (如果同香港比較)，不過起碼唔會失禮。
飯堂一個午餐通常都要最少瑞典幣 (下同) 60 至 70 蚊左右，包沙律、主菜、部份飯堂會包飲品。飯堂通常都好遲開 (上晝十、十一點左右) 同早收 (下晝三、四點左右)，所以基本上只有午市同小食，唔駛旨意食晚飯 (自己返屋企煮啦)。
校園本身都好早收，部份更加傍晚六、七點會趕人走，要開夜基本上只有返屋企繼續努力 (最好休息下啦)。
瑞典大學嘅圖書館通常都接受公眾進入，唔一定要師生先入得，而且好多時公眾人士都可以申請圖書証借書、影印。圖書館影印、列印通常一頁A4要三毫黑白，一蚊彩色左右。
大學通常都唔會有免費體育設施，如果想做gym，基本上都要去出面申請gym membership，每個月二百至六百蚊不等，留意下有冇學生優惠。
各大學對於加入學生會有唔同規定，有部份 (例如 Chalmers) 規定強制入學生會，其他 (例如斯德哥爾摩各大學) 就要入學生會先有得申請 (SSSB 等) 學生宿舍。亦有其他大學基本上除非參加學生會活動或者上莊，否則唔入都得。
Uppsala、Lund 兩間大學有 nation 制度 (哥德堡大學曾經有，但已取消)，歷史上係嚟自瑞典各地學生嘅同鄉會，依家基本上可以自己揀入會，功能上比較似俱樂部。
3. 衣食住行
瑞典物價同香港相距不遠，但要買平嘢未必咁易搵，建議去例如 Stadsmissionen 等二手物品舖。出街食飯基本上一定係貴 (瑞典並無好似香港茶餐廳咁平嘅一類嘢食)，快餐最平可以幫襯瑞典本土快餐連鎖 MAX 迷你餐 38 蚊 (包括細漢堡包、細薯條、細汽水)，(另有 Burger King、麥當勞等連鎖，通常一個餐 70 至 90 幾蚊不等)。
冬天除咗雨絨之外，水鞋可能會有用，因為當落落吓雪又融雪嘅時候，街道會出現一堆泥水。
(2020-08-31 編者加) 瑞典天氣以夏天同秋天比較濕、春天比較乾。與香港相比，瑞典氣候乾燥得多: 斯德哥爾摩嘅全年降雨量只有530毫米左右，連較潮濕的哥德堡亦都只有770毫米左右。相比之下，香港全年降雨量差唔多有2400毫米。當然，瑞典嘅冷風加驟雨感覺上唔太好受，加上就算好似喺斯德哥爾摩咁嘅大城市，都唔會好似香港咁有咁多有遮蔭嘅行人通道 (亦唔流行香港式嘅無縫接駁鐵路上蓋物業)，落雨出街濕身係無法避免嘅事。但係瑞典人有句俗語: Det finns inget dåligt väder, bara dåliga kläder (冇樣嘢叫天氣衰，只有著衫著得衰)。出街前記得睇天氣，諗好著乜衫先好出街啦。
如果有信教，基督教嚟講瑞典一定係由奉行路德宗 (信義宗) 嘅 Svenska kyrkan 獨大 (瑞典長年實施政教合一體制，1996年之前所有喺瑞典出世嘅人自動成為教徒，2000年開始政教分離，但 Svenska kyrkan 仍然保有部份特權，例如君主一定要係教徒，稅局會代收教會稅等)，另有其他教會 (frikyrkor) 。天主教徒就以移民背景居多，例如南歐、拉丁美洲、非洲裔人士等。其他宗教以伊斯蘭教、猶太教較多信徒，佛教近年因為由泰國、中國、越南等地而嚟嘅新移民開始興起。
如果咁不幸到依家都未搵到屋住，可以去 Blocket 搵出租房間。最壞情況可以暫住青年旅舍 (我未搵到樓住之前住咗兩個月青年旅舍)。
搭車: 如果住得好遠，可以買月票 (例如斯德哥爾摩 30 日學生票需要六百幾蚊)。如果唔係嘅話，寕願用幾千蚊買部單車，慳返好多搭車錢 (重可以得閒送外賣賺外快)。不過，斯德哥爾摩地勢充滿高低起伏，請有心理準備，踩單車會係非常好嘅鍛鍊。
記得申請 Mecenat 學生優惠咭! (依家已經唔一定要申請真咭，各大商戶都會接受用官方 App 顯示電子咭。) 除咗學生優惠之外，瑞典各大地方交通局都會要求學生票持有人帶備 Mecenat 咭 (除非自己學生證有註明)。如果有加入學生會，佢地可能會自動幫你申請。
祝大家學業進步，生活愉快!