Allemansrätten其實係乜嘢嚟? 略述瑞典郊野公共路權

去得多宜家家居嘅人,可能會留意到佢地有一種素菜丸/薯蓉/忌廉汁叫Allemansrätten。其實呢隻字,背後係瑞典社會一個好重要嘅權利。

Allemansrätten 字面解作「所有人嘅權利」,凡郊外嘅私人土地,都可以橫越。前提係 Leave no trace (不留痕),以及唔好騷擾民居。

自古以來嘅權利

Allemansrätten 係北歐傳統權利,傳統上北歐民眾會到樹林採集果實、蘑菇等等。至二十世紀,Allemansrätten 喺瑞典開始明文規範化,並喺1994年寫入憲法 (Grundlagen)。

因為 Allemansrätten ,你可以喺瑞典郊野自由自在周圍走,而且可以露營、生火 (注意,天氣炎熱乾燥時個別地區可能會有禁火令)。

因為 Allemansrätten ,你唔止可以喺森林小路上行走,重可以走出去穿越樹林。(所以瑞典咁多定向比賽。)

因為 Allemansrätten ,你可以自由喺郊野採集花朵、果實同蘑菇,

以上種種都毋須預先獲得地主批准,只要唔好破壞環境,唔好騷擾其他人,唔好影響受保護動植物,Allemansrätten 允許你喺瑞典郊野隨處走動。

(留意,公園以及自然保護區通常會對露營、生火、踩單車、携帶狗隻等另加規定。)

Allemansrätten in Sweden 瑞典郊野公共路權
Allemansrätten 係瑞典人民自古以來嘅權利。

其他國家有 Allemansrätten 嗎?

挪威嘅 Allemansrätten 同瑞典類似。至於喺芬蘭,私人土地上生火必須先獲地主批准。

丹麥並無全面嘅 Allemansrätten,喺私有土地上只可以喺道路、小徑上行走,而且唔可以露營,晚間完全唔可以進入私有土地上嘅樹林。

蘇格蘭有 Allemansrätten,包括露營。喺瑞士,民眾亦有權喺私人土地上嘅樹林露營,但喺德國同奧地利就唔可以。喺英格蘭,民眾只可以喺道路、小徑上行走。

維護郊野權利嘅挑戰

近年郊遊人士增加,瑞典郊野越嚟越受到挑戰,部份遊人欠公德心遺留垃圾等等,更有部份公司大規模採集花草,Allemansrätten 間中引起社會討論。有部份民眾,更以此為理由,以及出於尊重私有產權,提倡廢除 Allemansrätten。

但係大自然係屬於所有民眾嘅,所有民眾均有權享受大自然。Allemansrätten 作為傳統權利,要廢除並非易事。當然,維護享受郊野嘅權利,有賴大家盡公民責任,保護環境。

想了解更多關於 Allemansrätten ,可以到自然保護署 (Naturvårdsverket) 網頁