關於瑞典國慶嘅小知識

瑞典國慶點解係六月六日?

六月六日係Gustav Vasa 1523年獲選為瑞典國王嘅日子, 當時佢起兵反抗丹麥獨大嘅 Kalmar Union (丹麥、瑞典、挪威三國嘅共同王國),象徵瑞典重新獨立。其後,六月六日被稱為古斯塔夫日 (Gustafsdagen),以紀念之。

(留意,1523年瑞典仍然使用儒略曆 (Julian calendar),1523年嘅六月六日係公曆 (格里曆 Gregorian calendar) 六月十六日,但瑞典改曆後並冇換算節日日期,繼續喺六月六日慶祝呢件事。)

除咗 Gustav Vasa 之外,1809年6月6日瑞典立憲實施憲政君主制度,象徵瑞典進入現代政治體制年代。

十九世紀國族主義 (nationalism) 興起,斯德哥爾摩嘅露天博物館 Skansen 喺1893年打算以一個對國家有象徵意義嘅日子慶祝春夏之際,於是六月六日成為一個既方便又有象徵意義嘅日子。自此 Skansen 每年喺6月6日舉行慶典,呢一日遂漸成為對國家有重要意義嘅日子。

二十世紀初,瑞典民間發起國旗日慶典,並喺1916年6月6日喺斯德哥爾摩運動場 (1912年奧運主場館) 舉行第一次大型國旗日慶典,藉此推廣國民意識。但當年主辦單位並未有特別爭取6月6日成為正式國慶日,至1983年先至由國會立法確認6月6日係法定國慶日,2005年成為法定公眾假期。

1916年瑞典國旗日慶典海報
1916年瑞典國旗日慶典海報

瑞典國慶點解唔係其他日子?

除咗6月6日之外,另外兩個瑞典國王戰死嘅日子 (Gustav Adolf 1632年11月6日喺德國參與三十年戰爭時戰死,Karl XII 1718年11月30日攻打挪威邊境 Fredrikshald 時被炮彈擊中頭部致死) 亦一度成為國慶日嘅可能日子。另外重有使用現任國王壽辰或使用仲夏節 (6月20至26日其中一日) 作為國慶日嘅可能性。但係瑞典喺秋天嘅天氣同日照都不利進行戶外慶典,使用6月6日除咗可以確保夏天天氣方便喺戶外慶祝,亦確保國慶日同瑞典歷史有密切關係。

(題外話,由於Karl XII喺瑞典軍事歷史佔重要地位,其戰死標誌瑞典國力由盛轉衰,所以瑞典極右份子會喺11月30日紀念並藉機鬧事。)

瑞典人唔慶祝國慶?

瑞典重新獨立已經近500年,六月六日嘅歷史意義喺現代生活並唔係咁明顯,所以特別慶祝國慶嘅瑞典人並唔多。根據調查,2011年有25%嘅瑞典人慶祝國慶,2016年上升至31%。但相對挪威五月十七日滿街旗海,瑞典國慶相對低調得多。

相對國慶,仲夏節嘅傳統慶典 (跳舞、野餐等) 歷史較悠久,更深入民心,所以瑞典人通常重視仲夏節多過國慶,可謂「民間國慶」。

題外話: 瑞典國歌

Du gamla, du fria 係瑞典非官方國歌。瑞典係冇法定國歌嘅,亦冇國歌法,多年嚟瑞典試圖為國歌立法皆告失敗,各位可以放心喺6月6日用任何方式唱國歌慶祝國慶。更有趣嘅係,「國歌」竟然隻字不提瑞典—歌曲出現喺十九世紀中期北歐主義 (Scandinavism) 流行嘅時代 (1844年作曲),北歐主義提倡丹麥/瑞典/挪威一家親,所以歌曲只有講 Norden (北歐/北方) 而唔提瑞典。

當初呢首「北方之歌」係以愛國民曲形式傳播民間,不時有人認為呢首歌唔適合作為國歌使用,1900年更有人舉辦國歌徵集大賽,但最終仍然冇採立新國歌。約定俗成之下,「北方之歌」成為非官方國歌。

瑞典官方網站直播國慶日節目

Sweden.se 將會喺6月6日香港時間下午兩點鐘直播國慶日節目廿四小時,介紹瑞典藝術、飲食、文化、生活等。