新冠肺炎繼續肆虐，瑞典三月已經限制公眾活動唔可以多過 50 人，而公開活動基本上已經全面暫停。但係瑞典人既自律即將受到考驗，皆因聽日 (4月30日) 係瑞典重要節日—Valborg (Walpurgis Night，中譯沃普爾吉斯之夜)。
瑞典各地大學生每年4月30日都會舉行巡遊、嘉年華同其他慶祝活動。但今年情況特殊，全國各地市政府都要諗盡方法防止學生聚眾傳播病毒。倫德 (隆德) 大學 (Lunds universitet) 學生早前揚言4月30日要照出嚟去市立公園 (Stadsparken) 慶祝，惹嚟市政府反應—除咗用圍欄封閉公園同派出無人機監察外，更加諗到用奇招趕客
—喺公園淋雞屎!
雞屎係常用肥料，平時公園同花園護理植物都會用。但係面對非常時期，想唔到原來雞屎可以咁樣用! (附近居民唔會投訴臭味?)
Valborg 本身係紀念 Saint Walpurgis 嘅一個基督教慶日，傳統上會進行舞火篝等慶典。Saint Walpurgis 係公元八世紀嘅一個修女，本身係英格蘭人，後嚟去德國傳教，對於德國成為基督教重要地區有極大貢獻，後獲教廷封聖。故此 Valborg 係德國同其他受德意志文化影響地區 (包括瑞典) 嘅重要節日。而 Uppsala 大學學生自十九世紀開始，喺4月30日慶祝春回大地，呢個新傳統後嚟傳至瑞典其他大學，成為瑞典特有嘅大學生傳統。
(網上公有領域圖片)