SAS 放棄營辦香港航線 – 以後去北歐應該點搭?

新冠肺炎影響全球經濟,加上香港政局不穩,北歐航空 (SAS) 今日 (20日) 表示取消香港航線,即係話疫情過後唔會恢復派機嚟香港。

SAS 早前已經因為反送中示威浪潮影響,而減少香港航線每星期一班。SAS 將會繼續以聯銷 (interline) 方式,安排乘客以中國國際航空或中國東方航空分別接駁 SAS 嘅北京/上海航班。

SAS 曾經營運來往哥本哈根同埋香港啟德機場嘅航班,至1998年取消,2015年開辦斯德哥爾摩至香港航班,2018年恢復為哥本哈根至香港。

以後由香港去北歐,直航只剩芬蘭航空去赫爾辛基,轉機嘅話仍然可以使用漢莎、新加坡航空等。唔介意去中國大陸轉機嘅話,依然可以訂購 SAS 嘅中國國際/東方航空聯銷航班,或者直接購買中國國際航空航班喺北京轉機。

(資料圖片)