想喺瑞典讀書? 記得喺1月15日前申請!

有冇諗過喺瑞典讀書呢? 相比英美澳加等英語國家,瑞典對於香港人嚟講係相對冷門,不過如果你對自然科學、工程學科、創新科技等方面有興趣的話,作為創新科技先鋒嘅瑞典係一個唔錯嘅選擇。不過留意 — 2019年秋季入學首輪報名將於1月15日截止! (次輪報名喺四月,但如果你冇歐盟國籍嘅話係會申請唔切簽證)

語言障礙?

我聽過唔少朋友都對於喺瑞典留學有種迷思,就係喺非英語國家讀書,會唔會有好大語言障礙? 戴定頭盔先: 我自學咗半桶水瑞典文先去瑞典讀書,到咗瑞典再練到溝通到為止 (證據: 我打理嘅另一個用瑞典文介紹亞洲定向嘅網站 www.orien.asia,寫作算係越練越熟)。

大部份學士學位課程 (3或4年) 係以瑞典文授課,必須先考瑞典文能力評核 (TISUS 等) 方可報讀,TISUS 香港似乎有得考 (海外一年有兩次,五月/十月),但冇得讀 (除非你讀緊港大)。不過有啲學士學位課程係以英語授課,通常 IELTS 總分有 6.5 或以上就符合語言要求,此類課程通常係國際學生居多。

去到碩士課程情況就相反,通常係英語課程居多,都接受 IELTS 作為語言能力證明。

瑞典人一般講英文講得幾好 (老一輩未必講得好英文,卻可能會講得好德文,因為第二次世界大戰之前,德文係北歐最流行嘅第二語言)。但要真正融入社會,就必須講得好瑞典文 (本地生通常圍內玩,圍內講瑞典文,要埋堆也是要講得好瑞典文)。建議喺大學讀瑞典文課程,或者報讀市政府嘅免費 SFI 課程 (請自行搜尋自己市政府嘅網頁)。

生活費?

北歐生活費貴? 睇地方,瑞典係咁多北歐國家之中生活費相對較平嘅,例如我住緊嘅哥德堡,物價同香港比其實參唔多 (可能係匯價作怪,現匯價瑞典王冠幣轉港幣大概打九折再低少少,曾幾何時瑞典幣係貴過港幣,依家風水輪流轉),連租金每個月八千至一萬 kronor (港幣七千至九千左右) 絕對可以住得落。(全職工作嘅話,人工通常二萬至三萬 kronor 一個月左右。)

(講到貴,隔離挪威或者對面海丹麥就真係好貴,挪威人落瑞典掃平貨係家常便飯,唔少 Skåne 人會搭火車過海去哥本哈根打工,賺咗喺瑞典洗錢)

搭車真係好貴 (幾十 kronor 一程),但買月票真係平好多。學生記得申請 Mecenat 卡,使用學生飛遇上查票需要用作證明。(來往北歐,記得查 北歐航空 青年票價 youth ticket, 香港出發最平大概港幣四千多少少,優惠有效至廿六歲生日為止)

超市內各種魚醬
超市內各種魚醬

學費?

瑞典現時只有EU/EEA/瑞士公民可以免費就讀大學,否則要畀十幾萬至廿幾萬 kronor 學費不等。(讀博士係所有人免費兼有人工)

獎學金請自行向學校查詢。(好難搵!)

如果你係澳門人有葡籍,恭喜你,你可以喺瑞典免費讀大學! 至於英籍,(你見 Brexit 搞到亂哂大龍啦) 瑞典政府暫時未表態今年入學重有冇得免費讀 (據聞重喺度趕緊準備 No-deal Brexit)。(BNO就真係冇份啦)

報名

www.universityadmissions.se (只限學士/碩士,博士係當搵工咁直接去學校搵招聘告示申請)

請新增帳戶以開始報讀課程。

搜尋全國課程並報讀 (可選擇多個)

記得去 My pages 排次序同埋上載證明文件 (DSE證書/學校成績表、IELTS成績、護照),所有已經上載嘅文件第時再報讀都有效,唔駛再上載 (除非有新證書),亦唔好再徙錢郵寄

課程次序須於1月15日或之前辦妥,文件同申請費 900 kronor (EU/EEA/瑞士公民免申請費) 須於2月1日前辦妥,否則申請將會作廢

記得有啲課程需要你交作文/作品/其他嘢畀大學以作收生評核之用! (請留意個別院校指示,唔一定係喺呢頁上載,可能需要電郵或郵寄)

之後就係等 (可能有 Skype 面試,或者要自己買機票親身去瑞典面試)

今年放榜日係: 4月4日 (碩士) 4月18日 (學士)

有結果時系統會出電郵叫你自己上 universityadmissions 睇,可能性有 admitted (入到) / waitlisted (排 waitlist) / deleted (入唔到)

入到嘅話,恭喜你,請記得喺期限前確認就讀 / 交學費 (如果要交學費嘅話),然後就係申請簽證、等開學

開學後請記得申請居民登記,成功登記後再申請身份證,然後先可以開銀行戶口、申請其他好多嘢、等等

住宿

呢個反而係喺瑞典讀書最大障礙,學生宿舍通常主要由一間公司 (e.g. 哥德堡 = SGS) 負責,但要輪一年先有得住。(非歐盟學生可能會有特別安排,但不保證有)

瑞典學生通常會去 Blocket 等網站,好少會有成間屋畀你租 (哥德堡起碼要租金一萬先有),更多時係租一間房,同屋主共用浴室、廚房,俗稱 inneboende (在內居住者)

咁唔好彩開學都冇屋住,可以學我咁住青年旅舍先,一晚最平二百 kronor 左右,都算係咁啦,捱住先啦 (如是者兩個月終於租到屋)

 

不過租到間屋係半間車房改裝而成,返學搭一個鐘車咁遠嘅地方
不過租到間屋係半間車房改裝而成,返學搭一個鐘車咁遠嘅地方

瑞典有嚴重 (起碼大家認為係) 房屋問題,上資助樓房要等三年,不過租金同樓價同香港都差幾遠,三至四百萬 kronor 已經係哥德堡全新河畔住宅嘅售價 (算貴),呎價九千已經係最貴個堆,首都部份地區有售價過千萬嘅住宅 (不過大家都知嗰啲係有錢人地方),售價以億計嘅都有,不過極罕見,是為紀錄級數!

祝大家好運!